काठमाडौं : प्रदेश १ का मुख्यमन्त्री शेरधन राईले राजीनामा दिएलगत्तै एमालेकै नेता भीम आचार्यले मुख्यमन्त्रीमा नियुक्त हुनु भएको छ । आचार्यलाई प्रदेश प्रमुख सोमनाथ अधिकारी प्यासीले मुख्यमन्त्रीमा शपथ खुवाउनुभएको हो ।
त्यसअघि बसेको एमाले संसदीय दलको बैठकमा राईकै प्रस्तावमा आचार्यलाई संसदीय दलको नेता पनि बनाइएको थियो । यसअघि माधवकुमार नेपाल समूहमा रहेका नेता आचार्यले पछिल्लो समय एमाले अध्यक्ष केपी शर्मा ओलीलाई साथ दिँदै आएका थिए ।
लामो समयदेखि झलनाथ खनाल–माधवकुमार नेपाल समूहमा रहेका एमाले सचिव आचार्यले पार्टी विभाजनका बेला साथ छाड्नुभएको थियो । अध्यक्ष केपी ओलीले यसअघि नै प्रदेशको मुख्यमन्त्री बनाउने आश्वासन दिएपछि आचार्य एकता अभियानमा सक्रिय हुनुभएको थियो ।
