काठमाडौं: पोर्टो र डर्टमण्ड च्याम्पियन्स लिग फुटबलको क्वाटरफाइनलमा प्रवेश गरेका छन् । अन्तिम १६ को दोस्रो लेगको पहिलो खेलमा युभेन्टसले पोर्टोलाई ३–२ गोल अन्तरले पराजित गरेपनि युभेन्टस अवे गोलको आधारमा प्रतियोगिताबाट बाहिरिएको हो ।
अतिरिक्त समयसम्म लम्बिएको खेलमा युभेन्टसले १० खेलाडीमा सिमित पोर्टोलाई हराएको थियो । तर, समग्रमा नतिजा ४–४ गोलको बराबरी हुँदा पोर्टो अवे गोलको आधारमा अन्तिम आठमा पुगेको हो । यस अघि पहिलो लेगमा पोर्टोले युभेन्टसलाई २–१ गोल अन्तरले हराएको थियो ।
यस्तै, अर्को खेलमा स्पेनिस क्लब सेभियासँग २–२ गोलको बराबरीमा रोकिएपनि समग्रमा ५–४ को जित निकाल्दै जर्मन क्लब डर्टमण्ड क्वाटरफाइनलमा पुगेको छ । पहिलो लेगमा डर्टमण्डले सेभियालाई ३–२ गोल अन्तरले पराजित गरेको थियो । तर, अर्लिङ हालाण्डले दुई गोल गरेपनि घरेलु मैदानमा डर्टमण्ड बराबरीमा रोकिन पुगेको थियो ।
