काठमाडौं: लियोनल मेसीले महान खेलाडी ब्राजिली लिजेण्ड पेलेको कीर्तिमान बराबरी गरेका छन् । बार्सिलोनाका स्टार मेसीले एकै क्लबबाट खेल्दै पेलेको ६ सय ४३ गोलको कीर्तिमान बराबरी गरेका हुन् ।
भ्यालेन्सियासंग २–२ को बराबरी खेल्दा मेसीले बार्सिलोनाबाट एक गोल गरेका थिए । पहिलो हाफको ईन्जुरी समयमा मेसीले हेडमार्फत गोल गर्दै पेलेको कीर्तिमान बराबरी गर्न सफल रहे ।
मेसीले सन् २००५ मा बार्सिलोनाका लागि पहिलो गोल गरेका थिए । ८० वर्षीय पेलेले सन् १९५६ देखि १९७४ सम्म १९ सिजन ब्राजिली क्लब सान्तोषबाट खेल्दै ६ सय ४३ गोल गरेका थिए । मेसीको गोलका बाबजुत बार्सिलोनाले तालिकाको बीचमा रहेको भ्यालेन्सियाविरुद्ध जित निकाल्न भने सकेन । बराबरीसँगै २६ पटकको च्याम्पियन बार्सिलोना तालिकाको पाँचौ स्थानमा रहेको छ ।
