काठमाडौं: लिभरपुल च्याम्पियन्स लिग फुटबलको अन्तिम १६ मा प्रवेश गरेको छ । गएराति समूह डीको खेलमा लिभरपुलले डच क्लब अजाक्सलाई १–० ले हराउँदै नकआउट चरणमा स्थान पक्का गरेको हो ।
५८ औं मिनेटमा कुर्टिस जोन्सले लिभरपुलका लागि विजयी गोल गरेका थिए । अर्को खेलमा सिरि ए क्लब एटलान्टाले एफसी मिडजिलेन्डसंग १–१ गोलको बराबरी खेल्दै अंक बाँडेको छ । समूह डीमा शीर्ष स्थानको लिभरपुलको १२ अंक रहेको छ ।
यस्तै गएराति नै भएको समूह बीको खेलमा रियल म्याड्रिड शख्तर डोनेटस्कसँग २–० गोल अन्तरले पराजित भएको छ । शख्तरका लागि डेन्टिन्हो र मानोर सोलोमनले एक–एक गोल गरेका थिए । हारपछि रियल म्याड्रिड समुह चरणबाटै बाहिरिने सम्भावना बढेको छ ।
