काठमाडौं : नेपाली कांग्रेसले गठबन्धन कायम राख्नुपर्ने निष्कर्ष निकालेको छ । सानेपामा साेमबारदेखि जारी केन्द्रीय समिति बैठकबाट गठबन्धन कायम राख्नुपर्ने निष्कर्ष निकालेको सत्तारुढ दल कांग्रेसले जनाएकाे छ ।
‘समग्रतालाई हेर्दा हारजित थोरै मतले पनि हुनसक्छ । त्यसो भएकाले विविध कारणले गठबन्धन आवश्यक हुन्छ, गठबन्धन अरुले गर्दा के परिणाम आएको थियो भन्ने पनि हामीलाई थाहा छ।’ बैठकपछि प्रवक्ता प्रकाशशरण महतले भन्नुभयाे, अहिले जति पनि साथीहरूले बोलिराख्नु भएको छ‚ गठबन्धन गरेरै जानुपर्छ भन्ने निष्कर्ष छ।’
गठबन्धन गर्नुपर्ने पक्षमा बलियो मत रहे पनि कसरी गर्ने भन्ने बारेमा छलफलबाट निर्णय हुने उहाँकाे भनाइ छ ।
आगामी निर्वाचनका लागि पार्टीले ‘घरघर जाऔँ, कांग्रेस जिताऔँ’ अभियान फेरि सञ्चालन गर्नेसमेत प्रवक्ता प्रकाशशरण महतले जानकारी दिनुभयाे ।
