काठमाडौं: इंग्लिस प्रिमियर लिग फुटबलमा म्यानचेस्टर युनाईटेडले फराकिलो जित दर्ता गरेको छ । गएराति भएको खेलमा युनाईटेडले साउथह्याम्पटनलाई ९–० गोल अन्तरले पराजित गरेको हो । साउथह्याम्पटनविरुद्ध युनाईटेडले पहिलो हाफमा चार र दोस्रो हाफमा पाँच गोल गरेको थियो ।
प्रिमियर लिगको इतिहासमा युनाईटेडले दोस्रो पटक ९–० को जित निकालेको छ । यसअघि सन् १९९५ मा इप्सविचविरुद्ध युनाईटेडले ९–० को जित निकालेको थियो । साउथह्याम्पटनले पनि दोस्रो पटक ९–० को हार व्यहोरेको हो ।
गत सिजन साउथह्याम्पटन लेष्टरसँग ९–० गोल अन्तरले पराजित भएको थियो । जितसंगै युनाईटेडले लिगमा शीर्ष स्थानको म्यानचेस्टर सिटीसँग अंक बराबरी गरेको छ । दोस्रो स्थानको युनाईटेडले २२ खेलमा ४४ अंक जोडेको छ । साउथह्याम्पटन २९ अंक जोडेर १२ औं स्थानमा रहेको छ ।
