काठमाडौं : लियोनल मेसीले बार्सिलोनाबाट ६ सय ४४ गोल गर्दै ब्राजिली लिजेण्ड पेलेको कीर्तिमान तोडेका छन् । स्पेनिस ला लिगा फुटबलमा गएराति बार्सिलोनाले रियल भालाडोलिड ३–० ले पराजित गर्दा मेसीले रेकर्ड बनाएका हुन् । मेसीले एकै क्लबबाट सर्वाधिक गोल गर्ने पेलेको कीर्तिमानलाई भंग गरेका हुन् । मेसीले बार्सिलोनाका लागि तेस्रो गोल गरेका थिए ।
पेड्रीको ब्याकहिल पासमा मेसीले क्लबका लागि तेस्रो गोल गरेका थिए । मेसीकै पासमा क्लेमेन्ट लिन्गलेटले हेडमार्फत पाहुना टोली बार्सिलोनालाई अघि बढाएका थिए ।
३५ औं मिनेटमा मार्टिन बे्रथवेटले बार्सिलोनाको अग्रता दोब्बर बनाएका थिए । ईन्जुरी समयमा मेसीको प्रहार पोस्टमा लागेको थियो । ब्राजिली लिजेण्ड पेलेले १९ सिजन सान्तोषबाट खेल्दै ६ सय ४३ गोल गरेका थिए । उनले सन् १९५६ देखि १९७४ सम्म ब्राजिली क्लब सान्तोषबाट ब्यवसायीक फुटबल खेलेका थिए ।
