जम्बुलिङला फेल वतु कोरोना नेयाम तन्दा सङ युरोपकी माङस्योक लुङवाला ल्हाक्पा सिसिन ल्हाक्पा फेल् वतु छिग्यालकी साङग्यूर न्येसुर हाक को थुप्की । माङस्योक क्यानी छिग्याल लुङवा कोरोना नेयाम फेल्सा ल्येन्सी दिकी क्योन पयुलला खेल् वाई । पयुलको तेरी सिसिन ल्हक्कपा क्योन युल्कोरकी क्ष्योग्ला खेल वाई । चिला सिसिन पयुल स्युङकी जम्बुलिङला कोरोना नेयमकी क्योन थोङसीमा जम्लिङले हुङगु नम्डु तिवा क्योर वाई । ति तिराङ मिन्दा क्यान युरोपकी माङस्योक ग्याल्खापला कोरोना नेयाम फेल्सा ल्येन्सी जम्बुलिङन्ये मिमाङ्ग तिवा पयुल कोरा ग्याकुपला हुङ थुपु स्थिति म्येत् । ति तप्की छिग्याल्की लुङवाने पयुल कोरा ग्याकु मि हुङ माथुप्सीमा पयुलकी युल्को युल्कोरकी क्ष्योग्ला लाका किरु मिमाङ तिवा तेरी लाका म्येता गल् देन वाई । युल्कोरकी क्ष्योग्ला लाका किरु मिमाङ्ग तिवा तन्दा पयुल स्युङकी क्ष्योग्ने राहत गोकी सिने ङोकोल कियी वाई ।
तन्दी नेछुल्ला याङ तन्दा कोरोना नेयामकी क्योन माङस्योक लुङवाला फेल वतु तप्की युल्कोरकी लाका याङ काङ म्ये ति तप्की पयुलकी युलकोरकी क्ष्योग्ला लाका किरु मिमाङ्गतिवा लाका म्येता गल् वाई । तन्दी नेछुलला कोरोनाकी क्योन तिराङ मिन्दा क्यानी युल्कोरकी क्ष्योग्ला क्ष्याग्लेन नाङनी वतु मिमाङ तिवी वाङक्षा थोप्ता तिवा चुक क्यानी ठीमला ज्योक थुप्की सिरुकी कोर्ला साङ युल्कोरकी क्ष्योगला लाका किरु मिमाङ तिवाला क्योन खेल वाई । तन्दी ङिमा सग युल्कोरकी क्ष्योग्ला क्ष्याग्लेन नाङगु मिमाङ तिवी वाङक्षा थोप्ताङकी कोर्ला पयुलकी ठीम, युल्कोरकी थोकला जोउकी ठीम तङ श्रमिक तिवी थोकला जोउकी ठीमला हुङ माथुपु तप्की दि नाङला युल्कोरकी क्ष्योग्ला लाका किरु मिमाङ तिवी थोक्ला चुक क्यान दि ठीम तिवा जो थुप्की सिरुकी कोर्ला छोक्दु, टोगु कोतुरकी ल्यारिम तिवा गोढिक क्यानी गोमा क्यासिनाङ सिक्याउ दोके क्यानी ल्यारिम तिवा फेन छेन्मु ढो माथुप वाई ।
युल्कोरकी क्ष्योग्ला क्ष्याग्लेन नाङगुप मिमाङ तिवी जोम्ने गो चुवु छोम्पा तिवी युल्कोरकी क्ष्योग्ला क्ष्याग्लेन नाङगुप मिमाङ तिवा याङना मजदुर तिवी कोर्ला जो माथुपु ति तेरी सिसिन गोमाला याङ दि क्ष्योग्ला लाका किरु मिमाङ तिवा राङगी लाका मिसिन ठीमकी कोर्ला ङार क्यानी गोमा क्यान वाई । ति क्यासीनाङ राङगी छोक्पा छोक्पा नाङला राङ थिन्ने ल्यारिम तिवा गोमा कि मुथुप्सा ल्येन्सी युलकोरकी क्ष्योग्ला क्ष्याग्लेन नाङगुप मिमाङ्ग तिवी सिक्याउ दोके क्यानी सेवा तिवा लाङ माथुप वाई । दि तिराङ मिन्दा क्यानी युल्कोरकी क्ष्योग्ला क्ष्याग्लेन नाङगुप मिमाङ तिवा याङना मजदुर तिवी कोर्ला जो माथुपु तोन्दाक याम्बा ति तन्दा सग पयुलकी स्युङकी युल्कोरकी थोकला ठीम जोप मिमाङ तिवा दि युल्कोरकी कोर्ला खेन्थोक म्येतु मिमाङ तिवा ति ठीम जोप दाशाला वतु तप्की यिन् सिरुति युल्कोरकी कोर्ला गो छुवु छोम्पा तिवी सियी वान् वाई ।
युल्कोरकी क्ष्योग्ला ठीम जोप दाशाला ति युल्कोरकी कोर्ला खेन्थोक वतु मिमाङ्ग मेसा ल्येन्सी तन्दा पयुलकी युल्कोरकी क्ष्योग्ला लाका किरु मिमाङ्ग तिवी थोकला ल्यारिम तिवा हुङ माथुप वाई । चिला सिसिन त युल्कोरकी क्ष्योग्ला लाका किरु मिमाङ्ग तिवाला ति क्येनी कले गिवी सिरुकी कार्ला ल्यामु क्यान खेन्थोक म्येसा ल्येन्सी ति दि युल्कोरकी क्ष्योग्ला लाका किरु मिमाङ्ग तिवी पक्षाला ठिम तिवा हुङ माथुपु यिन । ति तिरनङ मिन्दा क्यानी युल्कोरकी क्ष्योग्ला क्ष्याग्लेन नाङगुप मिमाङ तिवी कोर्ला ल्यामु क्यानी ल्यारिम तिवा गोडिक कि माथुप ताङ ठीमकी कोर्ला ल्यमु क्यान खेन्थोक लाङ माथुपु साङ यिन् । युलकोरकी क्ष्योग्ला लाका किरु मिमाङ तिवासाङ माङस्योक क्यानी ठीमकी कोर्ला नासम मोतोगु तप्की साङ यिन् ति तप्की दिकी कोर्ला स्युङ ताङ युल्कोरकी क्ष्योग्ला क्ष्याग्लेन नाङगु मिमाङ तिवा ङिकारकी कामजोरी यिन्
तन्दा युल्कोरकी वाङक्षा थोप्ताङकी सखुला लाका कियी वाउ छोक्पा तिवी तेरी सिसिन गोमाला याङ युल्कोरकी क्ष्योग्ला क्ष्याग्लेन नाङगुप मिमाङ तिवा याङना मजदुर तिवी कोर्ला सामाजिक सुरक्षा कोष जो गोकी सिरु कोर गोमा क्यान वाई । दुकराङ क्यानी युल्कोरकी क्ष्योग्ला क्ष्याग्लेन नाङगुप मिमाङ तिवा याङना मजदुर तिवी कोर्ला ठीम तिवा जोपला स्युङला टोङगु तेरी तङ खोङ तिवी वाङक्षा थोप्ताङकी कोर्ला ल्यामु क्यानी ठीम जोपला खोङ तिवी मुलाराङ टोङगु कोतुरकी ल्यारिम गोढिग किरु राङ ल्यारिम चोवो जोन गोमा क्यान् वाई । दुकराङ क्यानी पयुल स्युङकी ल्यरिम खुन हुङ बजेटकी कोर्ला साङ युल्कोरकी क्ष्योग्ला क्ष्याग्लेन नाङगुप मिमाङ तिवा याङना मजदुर तिवाला खेन्थोक तेरु ल्यारिम तिवा गोमा किरु मिग्युल साङ गोमा क्यान नोक । दि ति चिला सिसिन तन्दी तुछो सगला वाउ बजेटकी कोर्ला सिरु यिन् सिसिन् तन्दा ल्यामु क्यानी याङ स्युङकी ठीम चुक क्यान गोमा कि थुप्की दिकी कोर्ला याङ तन्दा छ्याप्सी स्योखाला ज्युनी क्ष्याग्लेन नाङगुप् मिमाङ तिवी मिसिन छ्याप्सि छिक्चो ति हाक का मि तन्दा सग टे«किङ किरु मिमाङ तिवा सिक्याउ दोके म्येत् ।
युल्कोरकी क्ष्योग्ला लाका कियी वन् वतु मिमाङ्ग तिवा ति माङस्योक क्यानी फुला देतु तप्की टिक्पेला लोप्ज्युङ किरु सिसिनाङ मर्चा स्योम्बुला युल्कोरकी क्ष्योग्ला लाकाला गल्सिमा टे«किङला ति चि लाका ल्यामु ङेकित्ये सिने युल युन्ये खाङवा स्यिङ क्युन ज्याङनी यम्बुर वान् देसिमा तन्दा दि लक डाउनकी जोसीमा युल्कोरकी लाका ति म्येसीमा खोङ तिवाला कले गल् वाई । युला लोङ्नी ढोप् सिसिन् स्यिङ वाजोतिवा कोनी देपुला सोक्पा, यम्बुरला देतुराङ यिन्सीनाङ गोमाला जोनी ज्याकु टेङगा तिवा च्ये च्ये सोनी देतु मिसियाङ दिला थप्च्या ति मिन्दुक । तन्दा सगयाङ दि युलकोरकी क्ष्योग्ला लाका किरु मिमाङ्ग तिवाला ति दि राङ यिन् सिरु ठोस् राहत हुङ माथुप वाई ।
लालाई ललाई ल्याखुङ तङ पयुल स्युङकी साङ ङिमा च्याङाकी प्याकेज जोनी राङगी लुङवा कोरा ग्याक गोकी सिने ल्यारिम तिवा जोनी गोमा क्यान वाई । ति क्यासिनाङ दि ला ति पाल्ज्योरकी क्ष्योग्ने साङ नासाम तोङ गोकी । त ङिमा च्युथम्बा च्येङा चोई टे«किङ लाका क्यानी ति मिज्यी क्योगुपला कले राङ गिवी । काङग्री ज्येकुला सोक्पा, लुङवा ल्हापला सोक्पा दि ति तेरी पाल्ज्योरकी मुला थिने हुङ तप्की तन्दा छिग्यालकी मिककरु तिवा वाउ दोके ति म्यागी ति तप्की स्युङकी दिकी कोर्ला नासम तोङ गोउ हारिङकी खाक्छे यिन् । चिला सिसिन तन्दा मिककरु च्यिग कोरा ग्याकुला वउ ताङ पयुलकी मिमाङ कोरा ग्याकुला फेउ ल्हाप यिन् सिसिन मिककरु च्यिग वसिन तन्दा स्युङला ट्याक्स, दिकी थोकु च्यालाक तिवा ङ्योप् पर्ला बिन्दु ट्याक्स, तन्दा कम्पनीला, गाइडला खुरु खुरु मिमाङ्ग तिवा तेरीला मर्चा हुङ थुप्की दुकराङ क्याने खेप्साङकी क्ष्योग्ने ल्हाप यिन् सिसिन् ति छिग्यालकी मिमाङ्ग फेउ दोके याङ म्यागु तप्की सुरक्षाकी उपाय तिवा अपानाए क्यानी युल्कोर की लाका गो बे गोउ हारिङकी खाक्छे यिन् ।
अन्तारिक पर्यटन साङ मेलोक्पा याङ मिन् दि साङ ल्यामु याङ यिन् ति क्यासिनाङ तन्दा मर्चाकी क्ष्योग्ने ल्हाप यिन् सिसिन ति छिग्याल्की मिमाङ तिवाराङ ल्यामु यिन् । पयुल स्युकी ज्यिुकथामा सग सिनी ल्यारिम चोवो तिवा खुन होङ गोकी । युलकोरकी कार्ला तन्दा सग जोउकी ठीम तिवा ल्यामु क्यानी लोप्ज्योङ क्यानी काङ मालाङ नोक दिकी कोर्ला नासाम ताङनी गामा कि थुप गोकी । सिसिन युल्कोरकी क्ष्योग्ला क्ष्याग्लेन नाङगुप मिमाङ्ग तिवी कार्ला तेरी सिसिन खाक्छे क्यानी समाजिक सुरक्षा कोष ती चुक क्यान यिन्सिनाङ व्यावस्था कि थुप् गोकी ।
दुकराङ क्यानी स्युङ ताङ दिकी क्ष्योग्ला लाका किरु मिमाङ तिवा ङ्याम्डेल क्यानी दाशा ल्यामु ल्यामु तिवा क्येनी नोक छल्नी, दाक्पी लुङवा याङ क्ष्यो रिग्स्युङतिवा ल्हाक्पा सिसिन ल्हाक्पा वतु लुङवा यिन्दुकी दिकी कोर्ला ल्यारिम तिवा जोनी छिग्याल लुङ जम्बुलिङला खेन्थोक तेर थुप्सी गोकी । युलकोरकी क्ष्योग्ला क्ष्याग्लेन नाङगुप मिमाङ्ग तिवी साङ राङ माग तिवा ज्योकु पर्ला सु सिसिन सु खावा माक्यावा क्यानी तेरी च्यिक्डिल क्यानी गोमा कि थुप गोकी । थुग्जिछे ।
यो लेख गोरखापत्र दैनिकमा सोनाम याङजी शेर्पाले लेखिएको हो ।
