पयुल, माछी जालैमा कान्छी फेवा तालैमा लु की छ्योक्नी चिछोग नाङला स्येपेतकी कोर्ला तेरीकी स्येमला दे थुपु दावा के श्यार्वा भोजपूर जोङखाकी लु खेन्पा शिक यिन् । श्यार्वी चिछोग नाङला श्यार्वा सेपेत तिवा सिक्याउ दोके क्यानी याम्बा चिछोग नाङलासाङ दाशा ङेतु सेपेत तिवा थेप्तोक गोला ङो थुपु पर्ला दावा श्यार्वा पयुल चिछोग नाङला सेपेतकी क्ष्योग्ने राङ्गी ङोशी ज्योकुला गोमा क्यान वाई । फमा दाल्हमु श्यार्वा ताङ पला नुर्वु श्यार्वी वाङदु भोजपूर जोङखाकी भोजपूर नगर पालिका २ हात्तिखर्कला २०५१ भाद्र गते च्यिगला केउ श्यार्वा शेर्वी चिछोग नाङला स्थान ल्यामु लान सिन्दुप स्येपेत यिन् । श्यार्वी चिछोग नाङला स्येपेतकी थोक्ने ङोशी ज्योक थुपु दावा श्यार्वा श्यार्वी चिछोग नाङला ज्युकी ङिमाला चार्चित स्येपेतकी थोक्न्ये ङोशी ज्योक मिग्युल खुन्ने गोमा क्यान वाई । खोङकी तन्दा सगला श्यार्वी नेपालीला अधुनिक लु, नादिङ लु तिवा वाङ्ङी लोङगु कोङफेल गल् वाई सिसिन मोडेल ला साब आभिनय क्यान वाई । सिसिन तन्दा सगला श्यार्वी तुछेन चा छेन्बु लोसारकी रिङला गोढिग क्याउ ल्यारिम ताङ पयुल ग्याल्खाप नाङला गोढिग क्याउ ल्यारिम नाछोग ताङ लोसारकी रिङला हङकङला गोढिग क्याउ ल्यारिमला राङगी प्रफोमेनस ज्याङ वाई ।
लोप्ज्यु किरु पर्ने ज्युन राङ कविता गजल तिवा टिकी वाउ दावा के श्यार्वी स्येपेतकी गोमा सिसिन भोगपुर जोङखाला उसू संघ भोजपुरकी गोढिग क्याउ उसु खेल च्येप पर्ला लु लासिमा तेरीकी ल्येमु नोक सिने हसौला विन्दु तप्की दि पर्ने ज्युन राङ ल्यारिम टिक्पे टिक्पेला लु लाङगीन गोमा क्याउ यिन् । खाङ्वा पाला मामा तेरीकी दुगराङ क्यानी छेङगा छाली तिवी रोगरम क्यासिमा खोङकी थेङ थाङपोकी एल्वम अन्यौल न्ये ल्यामु क्यानी गोमा क्याउ यिन् । अन्योल एल्वम नाङला वतु लु ङकरकी छिक, रोल्याङ विन्दु शेर्वी राङला साङ सेपेतकी थोक्ला हुङगुला एपी शेर्वी सम्झननै आज भोली आउदैन सिरु लुने पेरण क्ष्युङगु साङ खोङकी सुङसुङ ।
सेपेत दावा के श्यार्वी लोप्ज्युङकी कोर्ला सिरु यिने सिसिन भोजपुर जोङखाकी सगरमाथा वोर्डिङ उच्च मा. वि. न्ये गोमा क्याउ खोङकी दि लोप्ज्युङ यम्बुकी ब्रिलियन्ट उच्चा माविन्ये बिबिएस सिन्दु यिन् । खोङकी सेपेत ताङ रोल्याङकी थोक्ला साङ लोप्ज्योङ कियी वाने वाई । खोरुङ्ग दोजो दाशा याङना दी थोकला लाम्सो गलुला चिछोगकी मिमाङ्ग तिवी छासेराङ खाक्छेम्बु रोकरम क्याउ साङ दोङकी सुङसुङ ।
श्यार्वी चिछोगकी स्याप्सी किरुकी मिग्युल ज्याङने गोमा क्याउ श्यार्वी चिछोग नाङला रोगराम साङ कियी वाने वाई । दुक्राङ क्याने दावा के शेर्वी श्यार्वी मीमाङ्ग तेरी टोछम ताङ छोङ ल्यातोन मुला याङना खला तिराब वतु तप्की खोरुबती कलाकरिता नेसुर श्यार्वा मिमाङ्ग जम्बुलिङला राङ्ग ङो स्ये जितु मिलाम खुन्ने गोमा क्याउ साङ खोङकी सुङसुङ । श्यार्वी चिछोग नाङला लु खेन्पाकी थोकला ङो स्येउ श्यार्वा ज्युकथामाला तुछो ताङ लाकी जोशा ल्होन्सी क्येनी ल्येप्सीनाङ दि लु लाङ्गु लाकाल टिक्पेन्ये ज्युनकी मिन्लाम यिन्दु तप्की क्युन माज्योकु साङ सुङसुङ ।
दुकराङ क्याने दिकी थोकला कोङफेल थोकुला ति चिछोगकी मिमाङ्ग तिवी रोगराम खाक्छे वतु ताङ तेरीकी रोगराम ङेनी तिराङ हारिङ्गकी ङिमाला दि दाशाला वतु सुङस्येत ज्योकिन ज्युकी ङिमाला साङ मिमाङ्ग तेरीको रोगरामकी खाक्छे वतु सुङसुङ । खोङकी याङलुङ याम्बा लु ताङ एल्वम जोई वतु साङ अराउराकी रिम्बाला सुङसङ । सम्बन्ध एल्वमकी तयारीला वतु तप्की दि नाङला वतु लु तिवी लु तिवा तेरी जोन् सिन्दु ताङ म्यूजिक भिडियो जोनी चिछोग नाङला खुङ हुङगु ल्यारिम खोङकी ति यिन् । श्यार्वी चिछोग नाङला खोरो मिन्लाम यार्गे जोपला सेमन्ये राङ दि लाका किरु सिन वसिन ज्युकथामाला चु क्यान यिनसिनाङ दिकी थोकला कोङफेल लाङ थुप्की सिरु उदाहण ति खोङकी बिन् वाई ।
श्यार्वी चिछोग नाब्गी स्येपेद् दावा के श्यार्वी श्यार्वी रिग्स्युङ ङिङ्वा ताङ ङेरिमकी लुग्सो चोई तिराङ वतु तप्की तासम पर्की श्यार्वी स्योन्नु तिवी दिला लाङ मोथुपु क्याने दिला लाङ थुपु याङना आधुनिकताला खुन हुङ्ग गोउ खाक्छे वतु ताङ चिछोग नाङला खुन् हुङगु साङ सुङसुङ । लाका काङ कीसिनाङ्ग ती नाङला लम्सो थोपुला छासेराङ्ग कले हुङगु तप्की दि दाशाला लेपु स्येगला रोगरम नाङगु राङगी खाङवी पाला मामा, आज्याङ इनी, आजी, रोल्याङकी गेकेन ताङ छेङगा छाली दुकराङ क्यानी श्यार्वी चिछोग नाङ्गी मीमाङ्ग तेरीला ङिङ थाक्पाने ज्युन थुग्जिछे सुङनाङसुङ ।
चिछोग स्यापस्युवा, श्यार्वी थोप्ताङकी कोर्ला स्युग ग्याकु ल्यारिमला फेप्ने ताङ कलाकरिता जे न्ये राङ श्यार्वी रिग्स्युङ यार्गे तोङगु ताङ श्यार्वा तिवासाङ कलाकारीताला हुङ थुप गोकी राङगी स्येम्ने राङ ल्यारिम तिवा गोमा क्याउ यिन् सिसिन याम्बा चिछोगकी सेपेत तिवी दोके क्यानी कोङफेल जो थुप्की सिरुकी नासाम ताङने गोमा क्याउ क्याउ दावा श्यार्वा हुतुङराङ शेर्वी चिछोग नाङगी लु खेन्पा यिन् । म त ब्रिटिसको लाउरे परिना सिरु लुकी थोक्ने चिछोग नाङ तेरीकी सेमला दे थुपु दावा के श्यार्वाल ज्युकी ङिमाला माछी जालैमा कान्छी फेवा तालैमा लु ने तेरीकी स्येमला दे थुपु तङ श्यार्वी चिछोग नाङला याङलुङ श्यावर््ि लु स्यावु्र ताङ लु सम्बा खुन हुङगु खोङकी सुङसुङ । स्येपेतकी थोक्ला गोमा क्याउ दावा के श्यार्वी ज्युक थमा साङ ल्यामु डोसी सिने टाशी मोन्लनम ग्याकु यिन् ।
यो सामाग्री गोरखापत्र दैनिक शेर्पा भाषा पृष्ठमा सोनाम याङजी शेर्पाले तयार परेको हो ।
