फायुल ल्येमु

ङ्या मिङ्ला नुरु शेर्वा हिन ! ङ केउ लुङ्बा यङ्ना ङे फायुल÷खाङ्बा खोटङ जोङ्गङ कि राखा बङ्देल हुल हेर्गे तोङ्गु छोक्पा ङ बाहने सिरु लुङ्बाला हिन । ङे लुङ्बि मिन ला बहाने शिप्दु सि ङ केयुलला शेर्वा मङ्पो ज्युनि होए । दिसिसिन गोमला ल्हाप यिन् सिसिन दोपेल शेर्वा मङ्पो छिगेल लुङवा फेम वाई । तिङ्सङ ङ ग्यालखापकी राजधानी हेम्बुरकि छोरोङ खासोर खाला देनि लोप्जुङ लोपिन् वाई यङ्ना लोप्जुङ्ग कि होये !

ति क्यासिनाङ ङला ङे केयुल राङ गा वाई चिला सिसिन दि लुङवा हुतुङराङ सिरु यिन् सिसिन राङयोग्की मोन्लाम ग्यापु दाशा ङलकी ग्यान्जी ताउ दोके ल्येमु वाई । ति तिराङ मिन्दा क्यानी ङेकि केयुल ल्हाप् हिनोक सिसि ग्याल्खापने स्यारकी क्ष्योगला खेल्गिवी । खोटाङ जोङ्गखा ग्याल्खापकी स्यारकी क्ष्योगला याङना तकाला याम्बुने ३०० किलोमिटर थकरिङ दाशाला खेल्गिवी । खोटङ जोङ्गखाला त्योनठुग ७६ युल हेर्गे तोङ्गु छोक्पा ह्योए त्योनठुग हुल यार्गे तोङ्गु छोक्पी नङ्ला शेर्वा तिवा ख्यनि छुठुक युल हेर्गे तोङ्गु छोक्पाला जुनि ह्योए शेर्वा तिवा मङ्पो हेम्बुरला ज्युवु ताप्की दि सिसिन गोमी गोमि तथ्याङ्क ला ल्हा हिन्सी पयुल तथ्याङ्क विभागकी छासेरा ङ्युङा क्ष्या तेन वाई ।

खोटाङ्ग जोङ्गखाला दुक क्यानी ल्हा ियिन सिसिन शेर्वा सिसिनाङ रोङ्ब तिवा मङ्पो थोङ्गीनोक ति हिन्सिनङ खोटाङ्गला शेर्वा तिवा रङ्गी ताम, क्ष्यो,े रिक्सुङ तिवा क्युन माज्याकु क्यानि रङगी ताम तिवा लोपिन वान् वाई । हुतुङ राङ ल्हाप हिनोक सिसिन शेर्वी ताम लोपु शेर्वा स्यारावा तिवा ताङबो ङुने ज्युन ज्युयी वाउ याङना श्यार्वा तिवी पुर्खेउली भुमी स्यखुम्बुला सिनङ ल्हाक्पा खोटाङ जोङ्गखाला ठे थुप्की ।

दुकराङ क्यनि ग्यल्खाप्की ने चा छेन्बु छेन्मुङ हलेसि न्ये सङ खोटाङ जोङ्गखाला रङ खेल्गिवी । खोटङ जोङ्गखाला काङग्री मेतु तप्कि खोटाङ जोङखाकी शेवा तिवा काङ्ग्रीला डोप शेर्वा मिमाङ्ग तिवा ठेतुला कले राङ खेल्गीवी । खोटङ ज्यु श्यर्वा तिवा छुङ्मा सोतु, सशिङ ताम्ने राङ्गी मिजी क्योङगु दुकराङ क्यानी लुक सोतु क्ष्याग्लेन तिवा ला ल्हाक्पा वाई । क्ष्याक्लेन याम्बा युल्कोर याङना ट्रेकिङ डोप कङ्ग्री ज्येकु क्ष्याग्ले ति मिकिनोक । खोटाङ जोङखाकी श्यार्वा तिवा छोङ ग्यकु तङ सिदोन ला खाक्छे लानी गोमा किनोक ।

याम्बुकी राजधानीन्ये ३०० किलोमिटर थाकरिङबु स्याकी क्ष्योगला खेलु खोटाङ जोङ्खा नाङला वतु नाङवा तिवी न्ये चा छेम्बु हलेसी मारातिका ला लेप्सी मि माङ्पो न्यो ज्योलुला फेप्की नोक । ति नाङला याम्बा चिछोगकी मिमाङ्ग तिवा तिराङ मिन्दा क्यानी शेर्वी चिछोगकी मिमाङ्ग तिवा साङ ल्हाक्पा सिसिन ल्हाक्प ठे थुप्कीवी । दिकी काङ हाक को थुप्कीनोक सिसिन खोटाङ नोङखाला क्येउ श्यार्वा मिमाङ्ग तिवा छासेराङ सोते गिर्पु राङ यिन् ।

हलेसी न्ये ज्याल्सि सोते किर्मु छ्युङु मोवा ज्याङने मिमाङ्ग तिवा ज्योल फेप्कीवी । गोमान्ये ज्युन ज्युयी वाउ मिमाङ्ग तिवी सुङ्स्येत न्ये काङ हाक को थुप्कीनोक सिसिन हलेसी न्ये चला वतु नाठुङ हुङ्ला होतु तोम खास्य, पाङिच्या, योत, टे तिवा नाठुङ हुङ्ल्ल होतु तप्की ति नठुङ नाङला वोतुु सेमचेन से डोप् पर्ला हलेसि कि न्ये ला गुरुरिन्बुछे न्ये ठेतु हिन सिरुति थेप तिवी नाङ्ला ठिनि होतु ठेगिनोक । दुरङ क्यानि छिग्गेल्की मिमाङ्ग सिनङ पयुल्की नाङवी क्ष्योवा मोवा तेपा किरु मिमाङ माङ्पो ज्योलुला फेप्कीनोक ।

हलेसि ने सलमु होतु तप्कि ने ज्योलुला मि मिमाङ फेप्किनोक कोरा तङ ने जलुला फेउ मिमङ तिवी लुङ्तर तङ खातकि हलेसि ने ल केङेन ताउ दोके जोनी छासेराङ ल्यामु थोङ्गी नोक । हलेसिला गुरुरिन्पोछेकि न्ये खाक्छेबु वतु तप्की न्ये ज्योलुला शेर्वा मङपो फेप्किनोक ति तिरङ मिदा क्यानि खोटाङ जोङखाङल ल्येर्मु ल्हाप मि मङ्मु फेप्किनोक । छक्छेप बुलुप गेव जिन्बा तोङु तङ मोलाम थोपु तुक्रङ क्येनि खोटङ्ग जोङ्खङ ला लामा रिन्पोछे मङ्पो फेकिनोक खोटङ जोङ्खकि मिला वोङ लुङ मङ्पो थोप्किनक ।

ट्याम्के, मैयू, मेरुङ्गडाँडा, नुप्ला ल्हाहिसि पहाडी ढाल ने सुनकोशी चङ्बु त्योवा ह्योतु खोटङ जोङ्खाला सिङ त्वा ल्हा हिन्सि लालिगुराँश, चिमाल, तङ मङ्पो मेन्दोक, फुकि सुक्पा धुपी सल्ल कि ल्हो नङ्ला छाराङ ल्यमु जोनि छासेराङ ल्यामु थोङगिवी । दुकराङ क्यानी दि जोङ्खाला खयर, साल तङ याम्बा गोङ कोर्मु नाउ नठुङ कि टोङ्ब साङ वतु तप्की खोटाङ होतुङराङ ससिकि कोर्ला कोर्मु तङ ल्यामु ह्योतु जोङखाकी थोक्ला लाङ थुप्कीवी ।

समुन्द्र सतह न्ये करीव १५२ मिटर न्ये ३६२० मिटरसम्म कि उचाईला होतु प्राकृतिक पर्वतमाला ट्याम्के, मैयू, मेरुङडाँडा, साल्पा, पत्रे छिग्ये गेर्पु टिक्पे (गाङ्दोक ) पहाडी डाँडा वोतु तङ दि जोङखाला सुनकोशी र रावा चाङ्बिी ल्यामु थुगु तङ बेंसी त्योइ मङ ल्यामु गोगिवी । खोटाङ जोङखाला ज्युन वोतु शेर्पा, राई, क्षेत्री, व्राम्हाण, नेवार, तामाङ, मगर, कामी, दमाई, सार्की जुनी तेरिति रङ्गी ताम तङ रिक्सुङ दाक दाक्पि ति ह्यो दोपेला सेक रङ्गी तम तङ रङ्गि रिक्सुङ दाक दाक्पी चिछोगकी सुङक्योप किवी वाई ।
थुग्जिछे ।