जम्बुलिङला तेरी सिसिन ल्हाक्पा वतु हामपुम तिवी ल्येगेन चिछोग नाङला तेरी सिसिन खाक्छेम्बु गिवी । ति नाङला साङ पयुलकी कोर्ला सिरु यिन् सिसिन राङगी चिछोग नाङगी रिग्सुङ ताङ लुक्सो सुङक्योप किरुला हामपुमकी ल्येगेन तेरी सिसिन खाक्छे वेत् ।
चिला सिसिन पयुल ग्यालखाप नाङला क्ष्यो नाछोग चेप मिमाङ्ग मङपो वसिनङ पयुल ग्यालखाप नाङला तेरीकी दा दाक्पी क्ष्यो, रिग्स्युङ, ढोलुग ताङ किताङ्ग नाताङ्ग तिवा दुकराङ क्याने चिछोगकी ङोलेन विन्दु रिग्स्युङ्ग तिवा ङे थुप्की । तन्दा एकाइसौ शताब्दीला वान् सिन्सिनाङ जम्बुलिङ्गकी पश्चिमी रिग्स्युङकी ज्याकु प्रभाव दाक्पी लुङ्वाला साङ थोङ थूपकी । तन्दी नेछुल्ला वानी मिमाङ्ग वाङ्गीकी रङ्गी ताम, क्ष्यो, रिग्स्युङ, ढोलुग ताङ किताङ नाताङ्ग तिवा ज्येन गल् वाई सिसिन मिमाङ्ग माङ्स्योकी दिकी कोर्ला हाक कोन् वासिनाङ तिला राङगी अवलम्बन याङना थोउ थोङ्ग मुथुपी ।
पयुल ग्यालखापकी दाशा थेन्बु याङना काङ्ग्यूकी छ्योगला देतु सिने जम्बुलिङ्गला ङोशी ज्याङ वतु श्यार्वा मिमाङ्ग तिवी साङ ज्युकी ङिमाला लोप्ज्युङ ताङ लाका नाछोगला दुकराङ क्याने दाशा किर्मू छोली पयुल ग्यालखापकी ग्याल्सा दुकराङ क्यान जम्बुलिङ्गकी दाशा, लुङबा नाछोगला ज्युन वतु श्यार्वा तिवी ति राङ्गी ताम, क्ष्यो, रिग्स्युङ ढोलुग ताङ किताङ्ग नाताङ्ग तिवा ङ्याम ढोप छाल् वाई ।
टिक्पेन्ये ज्युन रोङवी के ताङ ईन्जी केला लोप्ज्युङ्ग किरु ताङ हिन्दुकी लुक्सो लोप्ज्युङ क्यानी गोमा क्याउ पेजा तिवी रङगी ताम, क्ष्यो, रिक्श्यूङ तिवी कोर्ला दुकराङ क्याने रङ्गी चिछोगकी ढोताङ्ग ताङ किताङ नातङ तिवी कोर्ला मास्येउ ति वाङ्गी ठे थुप्की । ति तप्की ज्युकथमाला श्यार्वी ङोशी तिरुङ कले याङना ङ्याम ढिवी ।
चुको पेजाला यिन्सिनाङ्ग तेरी सिसिन लोप्टा थाङपो सिरुति खाङवा यिन् सिसिन गेकेन थाङपो सिरु खोङकी फमा यिन् ति तप्की तेरी सिसिन गोमाला पेजा तिवी लोप्ज्योङ्ग फमी तेसुर लोप्की । ति तप्की साङ श्यार्वा हामपुम तिवी राङ्गी ताम, क्ष्यो, रिग्स्युङ, ढोलुग ताङ किताङ नाताङ्ग तिवी कोर्ला हाक कोगोउ खाक्छे वाई । चुको हामपुमकी यिन्सिनाङ्ग खोङकी आङ्गा याङना पेजाला श्यार्वी केला अराउरा क्यानी श्यार्वी रिग्स्युङ तिवी कोर्ला ख्याप्डा ताङज्याकसुङ सिसिन दि आङ्ग याङना पेजी ज्युकी ङिमाला क्यानी गल्सिनाङ रङगी के ला साम्क्ष्यार ज्योक थुप्की दुकराङ क्यानी खोङला साङ रङ्गी चिछोग ढोताङ तङ किताङ नाताङ तिवी कोर्ला ख्याप्डा याङना जनाकारी गिवी ।
तन्दी नेछुल्ला श्यार्वा हामपुम तिवा ल्यारिम ताङ श्यार्वी चिछोग नाङला हुङगु छेङ्गा, जेन्दी तिवाला राङगी नम्सा नुम्ने फेउ तप्की रङगी नम्साकी सुङक्योप छ्युङ वाई । दुकराङ क्यानी श्यार्वी हामपुम तिवा खोम्लोङ वतु पर्ला श्यार्वी के मेसेउ तिवी के लाँप्नी याङ्ना क्ष्योकी कोर्ला हाक कोन् ज्याङ्गनी रङगी पेजा तिवालाङ दिकी कोर्ला जो ल्हामु क्यानी लोप्ज्युङ की थुप्की ।
हामपुम तिवी ल्हाखाङ्ग याङना नेकुरला क्येनी ढोसिनाङ्ग रङगी नाम्सा नुम्नी फेप्की दुकराङ क्यानी दाशा क्येनी गल्सिनाङ तेरीकी रङगी केला रङ अराउरा क्यासुङ्ग सिसिन श्यार्वी के सुङक्योप किरुला टिक्पेयी यिन्सिनाङ्ग रोगराम गिवी । रङगी के, क्ष्यो, रिग्स्युङ तिवा सुङ्क्योप किरुला काङ्ग्यू श्यार्वी रिग्ने तेवी छोक्पी लो जी गोमान्ये ज्युन साम्दे श्यार्वी टेन्सोला श्यार्वी के ला ताम स्येत डेन्दुर गोढिग कियी वाने वेत् दुकराङ क्यानी स्यावु्र डेन्दुर साङ गोढिग कियी वान् वाई । दिकी श्यार्वी के, रिग्स्युङ, ढोलुग सुङक्योप किरुला टिक्पेजी यिन्सिनाङ रोगराम थोप्की ।
दुकराङ क्यानी श्यार्वी के यार्गे जोपला याङना सुङक्योप किरुला पयुल ग्याल्सा याङना याम्बुला मन्जुश्री लोप्टा चुनी श्यार्वी के लोप्ज्युङ कियी वान् वेत् । दिकी साङ श्यार्वी के यार्गे जोप ताङ सुङक्योप किरुला रोगराम किवी । दुकराङ क्यानी श्यार्वी के यार्गे ताङ सुङक्योप किरु मिग्युलकी राङ याम्बु श्यार्वी ग्याङ्ढाग छोक्पी श्यार्वी केला ल्यारिम जिन्ख्योङपाकी ज्योङदार गोढिग कियी वान् वाई सिसिन गोर्खापत्रन्ये हुङ्गु श्यार्वी साङग्युर, रेडियो नेपालन्ये हुङगु साङग्युर ताङ ल्यारिम कि साङ श्यार्वी के सुङक्योप किरुल ा फेयान थो वासिनाङ चिछोग नाङला दिकी प्रभाव सिक्याउ दोके ढो माथुप वाई याङना मागल् वाई ।
श्यार्वी के, क्ष्यो, रिग्स्युङ तिवा सुङक्योप किरुरङ यिन् सिसिन तेरी सिसिन गोमाला श्यार्वा हामपुम तिवा दिकी कोर्ला हाक को थुपगोकी । पेजा तिवी लोप्टा थाङ्पो सिरुति खाङ्वा ताङ गेकेन सिरुती फमा यिन्दु तप्की फमा याङ खाङवी हामपुम तिवी दिकी कोर्ला हाक कोगोउ खाक्छे वाई ।
लोप्टाला लोप्ज्युङ्ग क्यासिमा तेरी सिसिन ल्हाक्पा पेजा तिवा फमी मुला गिवी । ति तप्की श्यार्वी के रिग्स्युङ तिवा सुङ्क्योप किरुराङ यिन् सिसिन श्यार्वी हामपुम तिवी किदी कोर्ला हक को गोकी चिछोग नाङला श्यार्वी के, क्ष्यो, रिग्स्युङ सुङक्योप किरुला ल्यारिम तिवा गोढिक क्यासिनाङ दिला सिङ्क्योप किरुला तेरी सिसिन ल्हाक्पा ल्येगेन हामपुम तिवी ति यिन् ।
